2016(e)ko otsailaren 8(a), astelehena

Antolatu, antolatu eta gehiago antolatu...IRABAZI ARTE

Uff...koff kooofff, oraindik zorabiatuta eta gure begiek, eguzkiaren argi-izpiekin mintzen direlarik, gure arropetako ximaurrak kolpeka kendu eta munduari berriro begiratu ahal izan diogu, behingoan bada ere, azken asteotan bizi izan dugunari benetazko tamaina hartzeko.
Ziega ilun batean hainbeste ordu pasatzeak, horrenbesteko pentsamenduen gira-buelta ematea ekartzen du ere. Milaka gauza pasatzen zaizkizu, lerro hauek idazten ari denari adibidez, ziega hoietan aurretik eta seguruenik, egoera okerragoan egondako euskal militanteen aurpegiak etorri zitzaizkidan burura. Pentsa momentu batez, gurea komunikatutako atxiloaldia izan zen, tratua ona eta hala ere tentsioa eta egoerak jaten gintuen.

Ezin sinetsita, asimilatu ezinda...hor geunden ziega-leku estu batean, apenas argirik baina burua eta animoa tente (kostata baina...). BANDA CRIMINAL, ez gutxiago ta ez makalago, hara! Enpin, lehen aipatu bezala, milaka kontu buruan bueltaka, eta bi hitz hoiek aste osoan zehar burmuinean taladratuak.

Gure artean sarri hitz egin dugu, hego-harmailetan kokatzen garen zaletuen eskubide zein askatasunen aldeko borroka honen ondorioen inguruan, sarri eztabaidatu dugu bai...Ondo ari al gara? Pena merezi du? Guzti hau, astez-aste El Sadar-eko ateetan zentsura kolpeak jasaten genituen bitartean, baita atxiloketak ere, gerora gertatuko zen iragarpen edo aurrekari makabroa bailitzan, bai.
Bai baina EZ, ez...inolaz ere ez,  ez dugu zalantzan jarri gure borrokaren eredugarritasuna eta balioa, hau da eta argi esan nahi dugu: HARRO GAUDE GURE ASKATASUN ETA ESKUBIDEEN ALDEKO BORROKAZ. Oso harro, edozein estamentu, instituzio edo zuzendaritzaren aurrean dagozkigun eskubideak defendatu ditugulako, ta hamaika aldiz errepikatuko genuke, komarik eta punturik kendu gabe.
Gogotik ordaindu dugu, bai...badakigu, baina bagenekien etsaiak bere peioak mugituko zituela hau gelditzeko saiakeran, saiakera antzua, izan ere argi baitugu borrokak balioa duela eta argiago dugu oraindik SOILIK ONDO ANTOLATURIKO HARMAILA (HERRI) BATEK LOR DITZAKELA HELBURU HANDIAK. Eta horretara goaz, noski.
Orain berriz ere, antolatuko gara, elkartuko gara eta ekingo diogu datorren eskenatoki berriari, bortitza izan da erasoa baina gure borrokaren duintasunak aurrera egitera garamatza. Beraz, gora buru hoiek eta bueltatu diezaiegun kolpea, helburuak lortu arte, irabazi arte!
Azkenik jasotako elkartasun keinu guztiak erkertu nahi genituzke, Vallekasetik, A Coruñara, San Mamesetik Gasteizera, Donostiatik Italia, PP.CC. zein Al-Andalusera...Ezker Abertzaletik, herri-mugimenduko beste edozein espresioetara eta noski nola ez kalean zein bestelako eremuetan mobilizatu diren herritar orori MILA ESKER!